brightness_1 ضحی (چاشت کے وقت) کی اہم سنت یہ ہے کہ آدمی ضحی کے نوافل ادا کرے۔

اس کی دلیل:

حضرت ابوہریرہ رضی الله عنه فرماتے ہیں : ’’مجھے میرے خلیل (جگری دوست) رسالت مآب ﷺ  نے ہر مہینے تین روزے رکھنے اور ضحی کی دو رکعتیں پڑھنے کی وصیت فرمائی اور یہ کہ میں سونے سے پہلے وتر پڑھ لیا کروں۔‘‘ (صحیح مسلم، حدیث: 721۔  )

سیدنا ابو ذر رضی الله عنہ سے روایت ہے کہ نبیﷺ  نے فرمایا: ’’تم میں سے ہر ایک کے جوڑوں پر ہر روز صدقہ فرض ہے۔ ہر تسبیح ’سبحان اللّٰہ‘ صدقہ ہے، ہر تحمید ’الحمدللّٰہ‘  صدقہ ہے، ہر تہلیل ’لا إلہ إلا اللّٰہ‘ صدقہ ہے۔ ہر تکبیر ’اللّٰہ أکبر‘  صدقہ ہے، امربالمعروف صدقہ ہے، نہی عن المنکر صدقہ ہے اور اس سے ضحی کی دو رکعتیں کفایت کر جاتی ہیں۔‘‘ (صحیح مسلم، حدیث: 720۔)

جوڑ دار ہڈیاں۔

صحیح مسلم میں سیدہ عائشہ رضی اللہ عنہا کی حدیث میں ہے کہ انسان کی تخلیق تین سو ساٹھ جوڑوں پر ہوئی ہے جو اتنی تعداد میں صدقات لے آئے تو وہ اس دن اپنے آپ کو جہنم کی آگ سے بچا لے گا

brightness_1 نماز چاشت کا وقت

سورج جب ایک نیزے کی بلندی پر آجائے تو نمازِ چاشت(ضحی) کا وقت شروع ہو جاتا ہے۔ مطلب یہ کہ طلوعِ آفتاب کے بعد جب نماز کا ممنوعہ وقت نکل جائے تو اس نماز کا وقت شروع ہو جاتا ہے۔

ظہر کا وقت شروع ہونے سے تقریباً دس منٹ پہلے اس نماز کا وقت ختم ہوجاتا ہے۔

اس كى دليل : حضرت عمرو بن عبسہ رضى الله عنہ سے روایت ہے کہ نبی کریم ﷺ نے فرمایا: ’’نمازِ صبح پڑھو، پھر نماز سے رک جاؤ حتی کہ سورج نکل کر بلند ہو جائے کیونکہ وہ جب طلوع ہوتا ہے تو شیطان کے دو سینگوں کے درمیان طلوع ہوتا ہے اور اس وقت کافر اس (سورج) کو سجدہ کرتے ہیں، اس کے بعد نماز پڑھو، اس نماز میں فرشتے حاضر ہوتے ہیں۔ یہاں تک کہ جب سایہ نیزے کے ساتھ بلند ہو جائے تو پھر نماز سے رک جاؤ کیونکہ اُس وقت جہنم بھڑکائی جاتی ہے۔‘‘ (صحیح مسلم، حدیث: 832۔)