brightness_1 وصیت لکھ رکھنا مسنون ہے

وصیت لکھ کر تیار رکھنا ہر مسلمان کے لیے مسنون ہے، خواہ وہ تندرست ہو، یا بیمار۔

رسول اللہﷺ نے فرمایا: ’’کسی مسلمان شخص کو جس کے پاس کوئی ایسی چیز ہو جس کی وصیت کرنا چاہتا ہو، اُسے یہ حق نہیں پہنچتا کہ وہ دو راتیں اس طرح بسر کرے کہ اُس کی وصیت اُس کے پاس لکھی ہوئی موجود نہ ہو۔‘‘ (صحیح بخاری، حدیث: 2738، وصحیح مسلم، حدیث: 1627۔)

دو راتوں کا ذکر وقت کی حد بندی کے لیے نہیں، مراد یہ ہے کہ جتنی جلدی ہوسکے، اُسے اپنی وصیت لکھ لینی چاہیے کیونکہ وہ نہیں جانتا کہ اُسے کب موت آجائے۔

یہ سنت عمومی حیثیت کی حامل ہے اور اپنے حکم میں سب لوگوں کو شامل کرتی ہے۔ جہاں تک حقوق اللہ اور حقوق العباد کے متعلق وصیت کا تعلق ہے، مثلاً: اداء زکاۃ، حج یا اداء کفارہ کے متعلق وصیت، یا اداء قرض کے متعلق وصیت، تو ایسی وصیت کا لکھ رکھنا واجب ہے، محض سنت نہیں۔

واجب اس لیے ہے کہ اس کے ساتھ فرائض کی ادائیگی وابستہ ہے۔ بالخصوص اُس وقت ایسی وصیت کی اہمیت بہت بڑھ جاتی ہے جبکہ ان واجبات کے متعلق کوئی اور کچھ نہ جانتا ہو۔ اور یہ قاعدہ ہے کہ واجب جس بات کے بغیر پورا نہ ہو، وہ بھی واجب ہے۔

brightness_1 خرید و فروخت میں نرمی اور وسعت ظرفی کا مظاہرہ کرناـ

خرید و فروخت کے معاملات میں خریدنے اور فروخت کرنے والے دونوں افراد یا دونوں فریقوں کو نرمی، وسعت ظرفی اور رواداری کا مظاہرہ کرنا چاہیے۔ انہیں اس سلسلے میں جھگڑنا نہیں چاہیے۔ دونوں فریق جہاں تک ہوسکے، ایک دوسرے کے لیے آسانی پیدا کریں۔

اس کی دلیل: حضرت جابر بن عبداللہ رضی اللہ عنہ سے روایت ہے کہ رسول اللہ ﷺ نے فرمایا: ’’اللہ ایسے آدمی پر رحم کرے جو اُس وقت نرم ہوتا ہے جب وہ (کوئی شے) بیچتا ہے اور جب وہ خریدتا ہے اور جب وہ تقاضا کرتا ہے۔‘‘ (صحیح بخاری، حدیث: 2076۔)

جب آدمی اپنے حق کا تقاضا کرے تو اُس وقت بھی نرمی اختیار کرنا سنت ہے۔

brightness_1 مسواک کرنا

مسواک کرنا ایک عمومی نوعیت کی سنت ہے جس پر ہر وقت عمل کیا جاسکتا ہے۔ نبی کریمﷺ اس کی بہت ترغیب دیتے تھے۔

آپﷺ نے فرمایا: ’’میں نے تمہیں مسواک کی بہت زیادہ تاکید کر دی ہے۔‘‘ (صحیح بخاری، حدیث: 888۔)

آپ نے مسواک کے متعلق یہ بھی فرمایا: ’’یہ منہ صاف کرنے اور رب کی رضا حاصل کرنے کا ذریعہ ہے۔‘‘ (مسند أحمد: 3/1، وسنن نسائی، حدیث: 5۔)

قیام اللیل کے وقت ، وضو کے وقت ، ہر نماز کے وقت ، گھر میں آنے سے پہلے ، مسواک کی سنت مؤکدہ ہوجاتی ہےـ

brightness_1 ہر نماز کے لیے نیا وضو کرنا

ایک مسلمان کے لیے مسنون ہے کہ وہ ہر نماز کے لیے نیا وضو کرے۔ مثال کے طور پر اگر اُس نے نمازِ مغرب کے لیے وضو کیا ہے تو اُسے چاہیے کہ نمازِ عشاء کے لیے بھی وضو کرے چاہے وہ پہلے سے باوضو ہو۔ ہر نماز کے لیے نیا وضو کرنا سنت ہے۔

اس کی دلیل: صحیح بخاری کی ایک روایت ہے کہ نبی ﷺ ہر نماز کے وقت وضو کیا کرتے تھے۔ (صحیح بخاری، حدیث: 214۔)

یہ بھی سنت ہے کہ آدمی تمام دن باوضو رہے۔ حضرت ثوبان رضی الله عنه سے روایت ہے کہ نبیﷺ نے فرمایا: ’’ ایک مومن ہی وضو کی حفاظت کرتا ہے۔‘‘ (مسند أحمد: 282/5، وسنن ابن ماجہ، حدیث: 277۔)