brightness_1 خوای گەورە لە زۆر جێگادا هانی داوین بۆ زیكركردنی , لەوانە :

1/ خوای گەورە هانی بەندەكـانی داوە زیكری خوا زۆر بكەن , خوای گەورە دەفەرموێت :{يا أَيُّهَا الّذينَ ءاَمَنُواْ اذْكُرُوْا الله ذِكْراً كَثِيراً * وَ سَبِّحُوْهُ بُكْرَة وَأَصِيْلاً} [ الأحزاب:41-42] . واته : ئه‌ی ئه‌و كه‌سانه‌ی بڕواتان هێناوه‌!  یادی خوا بكه‌ن یادێكی زۆر، واته‌: بێ حه‌دو سنور یادی خوا بكه‌ن(41) وه‌ هه‌موو به‌یانی و ئێواره‌یه‌ك خوا به‌پاك و خاوێن رابگرن و هه‌رده‌م (سبحان الله) بڵێن(42).

2/ خوای گەورە بەڵێنی بەو ژن و پیاوانە داوە كە زیكری خوا دەكەن بە لێخۆشبوون و پاداشتێكی زۆر , خوای گەورە دەفەرموێت: {وَالذَّاكِرِينَ اللَّهَ كَثِيراً وَالذَّاكِرَاتِ أَعَدَّ اللَّهُ لَهُم مَّغْفِرَةً وَأَجْراً عَظِيماً} [الأحزاب : 35 ] . واته : ئه‌و پیاوو ژنانه‌ی كه‌ زۆر یادی خوا ئه‌كه‌ن، خوا لێبوردن و پاداشتێكی زۆر مه‌زن و گه‌وره‌ی بۆ ئاماده‌كردون).

3/ خوای گەورە ئاگاداری كردینەوە لە رەوشتی دووڕەوەكان , جا ئەوان زیكری خوا دەكەن , بەڵام وردبەرەوە ئەندازەی زیكرەكەیان چەندە , خوای گەورە دەفەرموێت : {إِنَّ الْمُنَافِقِينَ يُخَادِعُونَ اللّهَ وَهُوَ خَادِعُهُمْ وَإِذَا قَامُواْ إِلَى الصَّلاَةِ قَامُواْ كُسَالَى يُرَآؤُونَ النَّاسَ وَلاَ يَذْكُرُونَ اللّهَ إِلاَّ قَلِيلاً }[ النِّساء:142]. واته : بێگومان دووڕووه‌ ده‌غه‌ڵه‌كان به‌خه‌یاڵی خاویان ده‌یانه‌وێ فێڵ له‌خوا بكه‌ن و بیخه‌ڵه‌تێنن! ئه‌و بڕه‌ ملكه‌چی و به‌رفه‌رمانه‌شیان هه‌ر بۆ ئه‌وه‌یه‌، به‌ڵام خوا خه‌ڵه‌تێنه‌رو ته‌فره‌ده‌ری ئه‌وانه‌، فڕوفێڵه‌كانیان زۆر به‌ ئاسانی پووچه‌ڵ ده‌كاته‌وه‌و سه‌رناگرن , هه‌ركه‌ ده‌چن بۆ نوێژ كردنیش ده‌بینی به‌ ته‌وه‌زه‌لی راست ئه‌بنه‌وه‌ و هه‌ڵده‌سن، چونكه‌ به‌ته‌مای پاداشت و خۆشنوودی خوا نین، له‌به‌رامبه‌ر خه‌ڵكدا رووپامایی ده‌كه‌ن و بۆ رووبینی نوێژ ئه‌كه‌ن! تا پێیان نه‌ڵێن كافرن , زۆر كه‌میشیان یادی خوا ده‌كه‌ن).

4/ وە خوای گەورە وریای كردینەوە كە سامان و منداڵ سەرقاڵمان بكەن لە زیكری خوا , خوای گەورە دەفەرموێت : {يَا أَيُّهَا الَّذِينَ آمَنُوا لَا تُلْهِكُمْ أَمْوَالُكُمْ وَلَا أَوْلَادُكُمْ عَن ذِكْرِ اللَّهِ وَمَن يَفْعَلْ ذَلِكَ فَأُوْلَئِكَ هُمُ الْخَاسِرُونَ }[ المنافقون: 9] . واته : ئه‌ی ئه‌وانه‌ی باوه‌ڕتان هێناوه‌! ماڵ و منداڵتان له‌یادی خوا غافڵتان نه‌كه‌ن، هه‌ركه‌سێك كاری وابكات! ئه‌وانه‌ن زیانمه‌ن و دۆڕاو ، چونكه‌ فه‌زڵ و باوی دونیایان به‌سه‌ر پاشه‌ڕۆژدا داوه‌.)

5/ وردبەرەوە لە گەڵ مندا لەم فەزڵە مەزن و شەرەفە بەرزە , خوای گەورە دەفەرموێت :{فَاذْكُرُوْنِي أَذْكُرْكُمْ}, واتە : ده‌سا ئێوه‌ ئه‌ی موسڵمانان! یادی من بكه‌ن، تا منیش یادی ئێوه‌ بكه‌م، پاداشتان به‌ چاكه‌ بده‌مه‌وه‌) .

وە لە فەرموودەیەكی قودسیدا فەرموویەتی : (من بە گوێرەی گومانی بەندەكەمم بەرانبەر بە من , وە من لە گەڵیدام ئەگەر یادم بكاتەوە , جا ئەگەر لە نەفسی خۆیدا یادم بكات ئەوا منیش لە نەفسی خۆمدا یادی دەكەم , وە ئەگەر لە نێو كۆمەڵێكدا یادم بكات ئەوا من لە ناو كۆمەڵێكدا یادی دەكەمەوە كە لەوانە چاكتر و باشترن) (بوخاری) ریوایەتی كردووە بە ژمارە (7405) و(موسلیم) بە ژمارە (2675) لە فەرموودەی (أبو هریرة) وە – رەزای خوای لەسەر بێت -.

brightness_1 وە ئەوەی لە سوننەتی پێغەمبەرەوە(صلَّى الله عليه وسلَّم) هاتووە لە جۆرەكانی زیكر زۆرن , لەوانە : (1)

1/ لە (أبو هریرة) وە هاتووە – رەزای خوای لێ بێت – كەوا پێغەمبەری خوا(صلَّى الله عليه وسلَّم) فەرموویەتی : (هەركەسێ بڵێت : هیچ پەرستراوێكی بە حەق نییە شایستەی پەرستن بێت تەنها (الله) نەبێت، تەنها و بێ هاوەڵە، موڵك و سوپاس و ستایش تەنها بۆ ئەوە و توانای بە سەر هەموو شتێكدا هەیە) هەر كەسێك لە رۆژێكدا سەد جار بیڵێت ئەوا (خەیر و چاكەی) بە ئەندازەی ئەوەیە دە كۆیلەی ئازاد كردبێت و سەد چاكەی بۆ دەنوسرێت و سەد خراپەی دەسڕێتەوەو لەو رۆژەدا پارێزراو دەبێت لە شەیتان تاكو ئێوارەی بەسەردا دێت وە لە رۆژی قیامەتدا هیچ كەسێك لە ئەو باشتری پێ نییە (یان لەو باشتری نەهێناوە) ئیللا كەسێك لەو زیاتری وتبێت.  وە هەركەسێك لە رۆژێكدا سەد جار بڵێت : (سبحان الله وبحمدە) ئەوا تاوانەكانی هەڵدەوڕێت هەرچەندە بە ئەندازەی كەفی سەر دەریا بێت )) (بوخاری) ریوایەتی كردووە بە ژمارە (3293) و(موسلیم) بە ژمارە (2691) .

2/ لە (أبو أیوب) ەوە هاتووە – رەزای خوای لەسەر بێت- پێغەمبەری خوا(صلَّى الله عليه وسلَّم) فەرموویەتی : (هەركەسێك بڵێت : (هیچ پەرستراوێك نییە شایستەی پەرستن بێت تەنها (الله) نەبێت , تەنها و بێ هاوەڵە , موڵك و سوپاس و ستایش تەنها بۆ ئەوە و توانای بە سەر هەموو شتێكدا هەیە) دە جار , ئەوا وەكو ئەوەیە چوار نەفسی لە كوڕەكانی ئیسماعیلی ئازاد كردبێت) (بوخاری) ریوایەتی كردووە بە ژمارە (6404) و(موسلیم) بە ژمارە (2693) .