brightness_1 Prej sunetit është që veshja e këpucëve të fillohet me të djathtën

Është e pëlqyer që muslimani ta fillojë veshjen e këpucëve nga këmba e djathtë. Gjithashtu është prej sunetit heqjen e këpucëve ta fillojë nga këmba e majtë.

Argument për këtë është hadithi i Ebu Hurejrës (Allahu qoftë i kënaqur me të!), i cili tregon se i Dërguari i Allahut (Paqja e Allahut qoftë mbi të!) ka thënë: “Kur ndonjëri prej jush t’i veshë këpucët, le të fillojë me të djathtën. Ndërsa kur t’i heqë, le të fillojë me të majtën. Le të jetë e djathta e para që vishet dhe e fundit që hiqet.” (Transmeton Bukhariu nr. 5856)

Në një tekst tjetër që ka ardhur te Muslimi transmetohet: “Askush prej jush të mos ecë me një këpucë! Le t’i veshë ose t’i heqë të dyja njëkohësisht.” (Muslimi  nr. 2097)

Në këto dy hadithe dalin në pah tre sunete:

1. Veshja e këpucëve të fillohet me të djathtën.

2. Heqja e këpucëve të fillohet me të majtën.

3. Këpucët të vishen ose të hiqen të dyja në të njëjtën kohë. Nuk lejohet të ecet me një këpucë të vetme.

brightness_1 Është e pëlqyeshme veshja e rrobave të bardha

Në kuptimin që: ngjyra e bardhë është e preferuar; bazuar në hadithin e Ibn Abasit (Allahu qoftë i kënaqur me të dy!), i cili na tregon se Dërguari i Allahut (Paqja e Allahut qoftë mbi të!) ka thënë: “Vishuni me të bardha, sepse ato janë prej rrobave tuaja më të mira. Edhe të vdekurit tuaj qefinosini me to.” (Transmeton Ahmedi  nr. 2219, Ebu Daudi  nr. 3878 dhe Et-Tirmidhi  nr. 994; Albani, në “Sahihu el-xhamia” vëll. 1, fq. 267, ka thënë se hadithi është sahih / i vërtetë.)

Dijetari ynë, Ibn Uthejmini (Allahu e mëshiroftë!) ka thënë: “Rrobat e bardha të përmendura në hadith përfshijnë: këmishat, pantallonat etj. veshje. Është sunet që ato të jenë të bardha. E bardha është ngjyra më e preferuar. Edhe nëse vishen rroba me ndonjë ngjyrë tjetër, nuk ka problem, me kusht që të mos jenë prej rrobave të veçanta për gratë.” (Shih: “Sherhu rijadi es-salihin” 2 / 1087)