सुन्नत मोअक्कदा : ती १२ रकात सुन्नतहरू हुन्, जुन फर्ज सलाहहरूदेखि कहिल्यै पनि अलग हुँदैन । कुनै फर्ज भन्दा पहिले र कुनै फर्ज भन्दा पछि पढ्नुपर्दछ ।
उम्मे हबीबह (रदियल्लाहु अन्हा) को हदीसमा छ, उनले रसूल (सल्लल्लाहु अलैहि वसल्लम) ले बयान गर्दै गरेको सुनिन् : “जसले दिन-रातमा फर्ज बाहेक १२ रकात सुन्नत (अतिरिक्त सलाह) हरू पढ्छ, अल्लाह तआलाले उसको लागि स्वर्गमा घर बनाउनु हुनेछ ।” (मुस्लिम : ७२८)
तिर्मिजीको हदीसमा अझ बढी व्याख्या गरिएको छ : “जोहर सलाहमा; फर्ज सलाह भन्दा पहिला ४ रकात (२-२ रकात गरी पढ्नु) र फर्जपछि २ रकात, मग्रिब सलाहमा; फर्जपछि २ रकात, ईशा सलाहमा; फर्जपछि २ रकात र फज्र सलाहमा; फर्ज सलाह भन्दा पहिला २ रकात ।” (तिर्मिजीले न० ४१५ मा हसन ‘सही’ भनेका छन्)
जैद बिन साबित (रदियल्लाहु अन्हु) को हदीसमा छ, रसूल (सल्लल्लाहु अलैहि वसल्लम) ले भन्नुभएको छ : “हे मानिसहरू हो, घरभित्र सलाह पढ्दै गर, किनभने पुरूषको लागि फर्ज बाहेकका अतिरिक्त सलाहहरू घरमै पढ्नु उत्तम हो ।” (बुखारी : ७२९०), (मुस्लिम : ७८१)
सुन्नत मोअक्कदाहरू मध्ये उत्कृष्ट सुन्नत फज्रको सुन्नत हो । यसको प्रमाण :
क) आइशा (रदियल्लाहु अन्हा) को हदीसमा छ, “रसूल (सल्लल्लाहु अलैहि वसल्लम) जुन जोस र जाँगरका साथ फज्रको सुन्नत पढ्नु हुन्थ्यो, उहाँको त्यो जोस र जाँगर अरू अतिरिक्त सलाहहरूमा देखिदैनथ्यो ।” (बुखारी : १८३), (मुस्लिम : ७६३)
ख) आइशा (रदियल्लाहु अन्हा) को हदीसमा छ, रसूल (सल्लल्लाहु अलैहि वसल्लम) ले भन्नुभएको छ : “फज्रको सुन्नत, दुनियाँ र दुनियाँमा पाइने सबैभन्दा अमूल्य चिजभन्दा उत्तम हो ।” (मुस्लिम : ७२५)
फज्रको सुन्नतका विशेषताहरू :
१) यात्राको आवस्थामा पनि फज्रको सुन्नत पढ्नुपर्छ । तर अन्य सुन्नतहरू, जस्तै जोहर, मग्रिब र ईशाको सुन्नत यात्रामा पढ्नु पर्दैन । (बुखारी), (मुस्लिम)
२) यसको पुण्य असामान्य छ । दुनियाँ पाइने सबैभन्दा अमूल्य चिजभन्दा उत्तम फज्रको सुन्नत हो ।
आइशा (रदियल्लाहु अन्हा) को हदीसमा छ, रसूल (सल्लल्लाहु अलैहि वसल्लम) ले भन्नुभएको छ : “फज्रको सुन्नत, दुनियाँ र दुनियाँमा पाइने सबैभन्दा अमूल्य चिजभन्दा उत्तम हो ।” (मुस्लिम : ७२५)
३) यी २ रकात सुन्नत एकदमै छोटो र मिठो तरिकाले पढ्नुपर्छ ।
यसको प्रमाण : आइशा (रदियल्लाहु अन्हा) को हदीसमा छ : “रसूल (सल्लल्लाहु अलैहि वसल्लम) फज्रको सुन्नत यति छोटो गरी पढ्नुहुन्थ्यो कि म सोच्ने गर्थें, खै, उहाँले अल्हम्दु पनि पढ्नु भयो कि भएन !” (बुखारी : ११७१), (मुस्लिम : ७२४)
तर यसमा शर्त के छ भने यति छोटो र हतारमा पनि नहोस् जसको कारणले फर्जमा कमी होस्, किनभने हतार गर्नबाट मनाही गरिएको छ ।
४) फज्रको सुन्नतमा पहिलो रकातमा सूरह फातिहापछि ‘सूरह काफिरून’ र दोस्रो रकातमा ‘सूरह एख्लास’ पढ्नु सुन्नत हो । (मुस्लिम)
अथवा पहिलो रकातमा सूरह फातिहापछि सूरह बकरहको आयत न० १३६ ‘कूलू आमन्ना बिल्लाही’ ..... देखि ‘व नह्-नो लहू मुसलेमून’ सम्म पढ्नु । (सूरह अल्-बकरह : १३६)
र दोस्रो रकातमा सूरह फातिहापछि सूरह आले इमरानको आयत न० ५२ ‘कुल या अहलल्-किताबे तआलौ .... देखि ‘बे अन्ना मुसलेमून’ सम्म पढ्नु सुन्नत हो । (मुस्लिम)
फज्रको सुन्नतमा दुवै तरिकाहरू रसूल (सल्लल्लाहु अलैहि वसल्लम) बाट प्रमाणित छन्, त्यसैले दुवै तरिकाले पढ्नु सुन्नत हो ।
५) फज्रको सुन्नत पढिसकेपछि दायाँतिर कोल्टो गरेर आराम गर्नु सुन्नत हो ।
यसको प्रमाण :
आइशा (रदियल्लाहु अन्हा) को हदीसमा छ : “रसूल (सल्लल्लाहु अलैहि वसल्लम) फज्रको सुन्नत पढिसकेपछि दायाँतिर कोल्टो गरेर आराम गर्नुहुन्थ्यो ।” (बुखारी : ११६०), (मुस्लिम : ७३६)
जाबिर बिन समुरह (रदियल्लाहु अन्हु) ले बयान गरेका छन्, “रसूल (सल्लल्लाहु अलैहि वसल्लम) फज्र सलाहपछि राम्रोसँग सूर्योदय नहुन्जेलसम्म सलाह पढेकै ठाउँमा बसिरहनु हुन्थ्यो ।” (मुस्लिम : ६७०)
