በአድ-ዱሓ ወቅት አንድ የአላህ ባሪያ የአድ-ዱሓ ሰላት መስገዱ ነቢያዊ ፈለግ ነው፡፡
ለዚህ ማስረጃው፡-
ሀ. አቢ ሁረይራህ -አላህ መልካም ሥራዎቻቸውን ይውደድላቸው-፣ ‹‹ወደጄ የአላህ መልእክተኛ -የአላህ እዝነትና ሰላምታ በእሳቸው ላይ ይሁን- በሶሰት ነገሮች ላይ አደራ ብለውኛል፡፡ -እነርሱም፡- ከእያንዳንዱ ወር ሶሰት ቀናትን በመጾም፣ በአድ-ዱሓ ሁለት ረከዐዎችና ከመተኛቴ በፊት ዊትር በመስገድ ላይ ናቸው፡፡›› ብለዋል፡፡ እንደዚሁም ነቢዩ -የአላህ እዝነትና ሰላምታ በእሳቸው ላይ ይሁን- አባ ደርዳእን -አላህ መልካም ሥራዎቻቸውን ይውደድላቸው- በዚሁወ ላይ አደራ ብለዋል፡፡ ሐዲሡን ሙሰሊም በሐዲሥ ዘገባ ቁጥር (722) ላይ ዘግበውታል፡፡ አባ ዘርንም -አላህ መልካም ሥራዎቻቸውን ይውደድላቸው- አድራ ብለዋል፡፡ ሐዲሡን አን-ነሳኢይ በአስ-ሱነኑ-ልኩብራ መጽሐፋቸው በሐዲሥ ዘገባ ቁጥር (2712) ላይ ዘግበውታል፡፡ አል-አልበኒይም የሐዲሡን ትክክለኛነት አረጋግጠዋል፡፡ አስ-ሰሒሐህ 2166፡፡
ለ. አቢ ዘር -አላህ መልካም ሥራዎቻቸውን ይውደድላቸው- እንዳስተላለፉት ነቢዩ -የአላህ እዝነትና ሰላምታ በእሳቸው ላይ ይሁን-፣ “ከእናንተ መካከል የአንዳችሁ የአካል መገጣጠሚያዎች ሁሉ ሰደቃህ ጸንቶባቸው ያነጋሉ፡፡ እያንዳንዱ ተስቢሕ (ሱብሐነልላህ) ሰደቃህ ነው፡፡ እያንዳንዱ ተሕሚድ (አልሐምዱሊላህ) ሰደቃህ ነው፡፡ እያንዳንዱ ተህሊል (ላኢላሀ ኢልለሏህ) ሰደቃህ ነው፡፡ እያንዳንዱ ተክቢር (አላሁ አክበር) ሰደቃህ ነው፡፡ በመልካም ማዘዝ ሰደቃህ ነው፡፡ ከመጥፎ መከልከልም ሰደቃህ ነው፡፡ በአድ ዱሓ የሚሰግዳቸው ሁለት ረከዐዎች እነዚህን ሁሉ (በምንዳ) ያብቃቁታል (ይስተካከሉታል)፡፡” ብለዋል፡፡ ሐዲሡን ሙስሊም በሐዲሥ ዘገባ ቁጥር (720) ላይ ዘግበውታል፡፡
ሙሰሊም በትክክለኛ የሐዲሥ ዘገባቸው ከዓኢሻህ -አላህ መላክም ሥራዎቻቸውን ይውደድላቸው- አንድ ሰው ከሶሰት መቶ ስልሳ መገጣጠሚያዎች በርግጥ የተፈጠረ መሆኑንና በትንሳኤ እለት በእነዚህ መገጣጠሚያዎች ሰደቃ ይዞ የመጣ በዚያን ወቅት ራሱን ከጀሃነም እሳት ነጻ አውጥቶ እንሚሄድ ያብራሩበትን ሐዲሥ ዘግበዋል፡፡
ወቅቱ፡-
የአድ-ዱሓ ሰላት ወቅት ጸሐይ ወገግ ብላ ከወጣችብት ወይም ሰላት መስገድ ክልክል ከሆነበት ጊዜ በኋላ ካለው ጊዜ አንስቶ ይጅምራል፡፡
የዙህር ሰላት ወቅት ከመግባቱ ከአስር ደቂቃ በፊት ይጠናቀቃል፡፡
ለዚህ ማስረጃው፡- ከዐምር ኢብን ዐንበሰህ -አላህ መልካም ሥራዎቻቸውን ይውደድላቸው- እንዳስተላለፉት የአላህ መልእክተኛ -የአላህ እዝነትና ሰላምታ በእሳቸው ላይ ይሁን-፣ “የሱብሒ ሰላትን ስገድ ከዚያ ጸሐይ ከወጣችበት በጣም ከፍ አስከምትልበት ጊዜ ድረስ ከሰላት ተቆጠብ፡፡ ከዚያ ስገድ፡፡ ይህች ሰላት ጥላ ከራሳ ይዘት ከፍ እስከሚል ድረስ መላእክት የሚታደሙባት የሆነች ሰላት ነች፡፡ ከዚያ ከሰላት ተቆጠብ፡፡ በዚህ ጊዜ ጀሃነም ትፋፋማለች፡፡…” ብለዋል፡፡ ሐዲሡን ሙስሊም በሐዲሥ ዘገባ ቁጥር (832) ላይ ዘግበውታል፡፡
በላጩ ወቅት፡-
በመጨረሻው ወቅት ላይ ነው፡፡ ይህም ጊዜው በሚሞቅበት ወቅት ነው፡፡
ለዚህ ማስረጃው፡-ዘይድ ኢብን አርቀም -አላህ መልካም ሥራዎቻቸውን ይውደድላቸው- እንደስተላለፉት ነቢ -የአላህ እዝነትና ሰላምታ በእሳቸው ላይ ይሁን-፣ “የጸጸት ተመላሾች ሰላት ጊዜው በሚሞቅበት ወቅት ነው፡፡” ብለዋል፡፡ ሐዲሡን ሙስሊም በሐዲሥ ቁጥር (748) ላይ ዘግበውታል፡፡
ኢብን ባዝ -አላህ ይዘንላቸው-፡- ‹‹…ይህ በወቅቱ መጨረሻ ላይ መሰገዳቸው በላጭ ከሚሆኑ ሰላቶች መካከል አንዱ ነው፡፡›› ብለዋል፡፡ ፈታዋ አል-ኢስላሚይየህ ቅጽ ፡ 1 ገጽ ፡ 515፡፡
የረከዐዎቹ ብዛት፡-
ትንሹ የአድ-ዱሓ ሰላት ረከዐህ ሁለት ነው፡፡ ለዚህ ማሰረጃው ቡኻሪና ሙስሊም በዘገቡት የአቢ ሁረይራህ -አላህ መልካም ሥራዎቻቸውን ይውደድላቸው- ሐዲሥ ላይ፣ ‹‹ወዳጄ የአላህ መልእክተኛ -የአላህ እዝነትና ሰላምታ በእሳቸው ላይ ይሁን- በሶሰት ነገሮች ላይ አደራ ብለውኛል›› ካሉ በኋላ፣ ‹‹በአድ-ዱሓ ሁለት ረከዐዎች›› የሚል ጠቅሰዋል፡፡ ሐዲሡን ቡኻሪ በሐዲሥ ዘገባ ቁጥር (1981)፣ ሙስሊም ደግሞ በቁጥር (721) ላይ ዘግበውታል፡፡
በስምንት ረከዐዎች ላይ የገደበውን ለመቃረን አብዛኛው ረከዐወህ ምንም ወሰን የለውም፡፡ ስለዚህ የሚሰግደው ሰው ከፈለገ ከስምንት በላይ መጨመር ይችላል፡፡ ይህም ዓኢሻህ -አላህ መልካም ሥራዎቻቸውን ይውደድላቸው-፣ ‹‹የአላህ መልእክተኛ -የአላህ እዝነትና ሰላምታ በእሳቸው ላይ ይሁን- አራት ረከዐህ ይሰግዱ ነበር፡፡ አላህ እስከሻው ድረስም ይጨምሩ ነበር፡፡›› ብለዋል፡፡ ሐዲሡን ሙሰሊም በሐዲሥ ዘገባ ቁጥር (719) ላይ ዘግበውታል፡፡
