brightness_1 በተክቢረተ-ል-ኢሕራም ላይ እጆችን ከፍ ማድረግ

ኢብን ዑመር -አላህ መልካም ሥራዎቻቸውን ይውደድላቸው- እንዳስተላለፉት፣ ‹‹የአላህ መልእክተኛ -የአላህ እዝነትና ሰላምታ በእሳቸው ላይ ይሁን- ሰላታቸውን ሲጀምሩ፣ ሩኩዕ ለማድረግ አላሁ አክበር ሲሉ እንዲሁም ከሩኩዕ ሲነሱ እጆቻቸውን እስከትከሻቸው ድረስ ከፍ ያደርጉ ነበር፡፡ ከሩኩዕ ሲነሱ፣ “ሰሚዐ-ልላሁ ሊመን ሐሚደህ ረብበና ወለከልሐምድ /አላህ የአመስጋኙን ምስጋና አዳመጠ፣ ጌታችን ሆይ! ምስጋናም ላንተ ነው፡፡/” ይሉ ነበር፡፡ ይህን ሱጁድ ላይ አይተገብሩም ነበር፡፡›› ብለዋል፡፡ ቡኻሪ ሐዲሡን በሐዲሥ ዘገባ ቁጥር (735)፣ ሙስሊም ደግሞ በቁጥር (390) ላይ ዘግበውታል፡፡  

ኢብን ሁበይራህ -አላህ ይዘንላቸው- እንዲህ ብለዋል፣ ‹‹በተክቢረቱ-ል-ኢሕራም ወቅት እጆችን ማንሳት ነቢያዊ ፈለግ በመሆኑ ላይና ግዴታ ባለመሆኑ ላይ ዑለሞች ሀሃሳባቸውን አንድ አድርገዋል፡፡›› አል-አፍሳሕ ቅጽ ፡ 1 ገጽ፡ 123፡፡ 

ይህ በተክቢረቱ-ል-ኢሕራም ወቅት እጆች የሚነሱበት ሥፍራ ዑለሞች የተስማሙበት ሥፍራ ነው፡፡ በሌሎች ሥፍራዎች ላይ እጆችን ማንሳት በተመለከተ በዑለሞች -አላህ ይዘንላቸው- ዘንድ የሃሳብ ልዩነት አለ፡፡

በሐዲሥ የተዘገቡት እጆች የሚነሱባቸው የሰላት ቦታዎች አራት ናቸው

የመክፈቻው ተክቢራህ ላይ

ረኩዕ ላይ

ከረኩዑ በመነሳት  ላይ

እነዚህ ሶስቱ ከኢብን ዑመር -አላህ መልካምሥራዎቻቸውን ይውደድላቸው- ከዚህ በፊት እንደተመለከተው በሁለቱ የሐዲሥ ዘገባዎች የተረጋገጡ ናቸው፡፡ አራተኛው ርዕስ፡-

ከመጀመሪያው ተሸሁድ (አት-ተሒያቱ) በሚነሱ ጊዜ

ይህ ከኢብን ዑመር -አላህ መልካምሥራዎቻቸውን ይውደድላቸው- እንዲሁ የተረጋገጠ በሆነው  በሰሒሑ-ልቡኻሪ ዘገባ ውስጥ ሰፍሮ የሚገኝ ነው፡፡

brightness_1 የሚሰግድ ሰው ቀኝ አጁን በግራ እጁ ላይ ማድረጉ ነቢያ ፈለግ ነው፡፡

ኢብን ሁበይረህ እንዳሰፈሩት ይህ ሁኔታ የአብዛኛዎቹ ዑለሞች -አላህ ይዘንላቸው- ስምምነት ነው፡፡ አል-ኢፍሳሕ ቅጽ፡ 1    ገጽ ፡ 124፡፡ 

brightness_1 ከሸይጣን ተንኮልና ጉትጎታ በአላህ መጠበቅ፡፡

ከሸይጣን ተንኮልና ጉትጎታ በአላህ መጠበቅ እንዲሁ  ነቢያዊ ፈለግ ነው፡፡ የሚለው ሰው በተለያየ ጊዜ የተለያየውን አገላለጽ መጠቀምም እንዲሁ፡፡ ይህን አስመልክቶ ከተዘገቡት ሐዲሦች መካከል፡-

ሀ. “አዑዉዙ ቢልላሂ ሚነ-ሽሸይጣኒ-ርረጂይም፡፡/ከተረገመው ሸይጣን በአላህ እጠበቃለሁ፡፡/”

ይህ አገላለጽ አብዛኛዎቹ ዑለሞች -አላህ ይዘንላቸው- የመረጡት አገላለጽ ነው፡፡ ይህንንም የመረጡበት አብይ ምክንያት፣ “ቁርኣንንም ባንበብህ ጊዜ ርጉም ከኾነው ሰይጣን በአላህ ተጠበቅ፡፡” (አን-ነሕል ፡ 98) በማለት የሰረፈውን የአላህ ቃል በመመርኮዝ ነው፡፡

ለ. “አዑዉዙ ቢልላሂ-ስሰሚዒ-ል-ዐሊይሚ ሚነ-ሽሸይጣኒ-ርረጂይም፡፡ /ሰሚና ዐዋቂ በሆነው አላህ ከተረገመው ሸይጣን እጠበቃለሁ፡፡/”

ይህ፣ “ከሰይጣንም ጉትጎታ ቢያገኝህ÷ (ከመልካም ጠባይም ቢመልስህ) በአላህ ተጠበቅ፤ እነሆ እርሱ ሰሚው ዐዋቂው ነውና፡፡” (ፉሲለት ፡ 36) ከሚለው የላቀው አላህ ቃል የተወሰደ ነው፡፡ 

brightness_1 ከአል-ፋቲሐ ምዕራፍ በኋላ አንድ የቁርአን ምዕራፍ ማንበብ፡፡

በመጀመሪያዎቹ ሁለት ረከዐዎች ላይ ማንበቡ ነቢያዊ ፈለግ ነው የሚለው የአብዛኛዎቹ ዑለሞች -አላህ ይዝንላቸው- ሃሳብ ነው፡፡ አቢ ቀታዳህ -አላህ መልካም ሥራዎቻቸውን ይውደድላቸው-፣ ‹‹ነቢዩ -የአላህ እዝንታና ሰላምታ በእሳቸው ላይ ይሁን- በአዝ-ዙህር ሰላት የመጀመሪያዎቹ ሁለት ረከዐዎች ላይ የአል-ፋቲሐን ምዕራፍና ሌሎች ሁለት ምዕራፎችን ያነቡ ነበር፡፡ የመጀመሪያውን ያስረዝሙ የነበር ሲሆን በሁለተኛው ላይ ያሳጥሩ ነበር፡፡›› ሐዲሡን ቡኻሪ በሐዲሥ ዘገባ ቁጥር (759) እንዲሁም ሙስሊም በቁጥር (451) ዘግበውታል፡፡ 

ነቢዩ -የአላህ እዝነትና ሰላምታ በእሳቸው ላይ ይሁን-፣ “የመጽሐፉን መክፈቻ ምዕራፍ ላላነበበ ሰላት የለውም፡፡” ማለታቸው የአል-ፋቲሐ ምዕራፍን ማንበብ ብቻ ከዘአል-ፋቲሐ ምዕራፍ በኋላ ለሚመጣው ምዕራፍ በቂው ነው ወይም ሌላ ምዕራፍ ሳያነቡ የአል-ፋቲሐ ምዕራፍን ብቻ ማንበብ ይቻላል የሚለውን ሃሳብ እንድንወስድ ያደርገናል፡፡ ድምጽ ይፋ ሆኖ በሚነበብባቸው ሰላቶች ተከታይ የሆነ ሰው ከአል-ፋተሐ በኋላ ያለውን  ምዕራፍን አያነብም፡፡ ዝም ብሎ የኢማሙን ንባብ ያዳምጣል፡፡ ሐዲሡን ቡኻሪ በሐዲሥ ዘገባ ቁጥር (756) እንዲሁም ሙስሊም በቁጥር (394) ዘግበውታል፡፡  

ኢብን ቁዳመህ -አላህ ይዘንላቸው- እንዲህ ብለዋል፣ ‹‹በመጀመሪያዎቹ ሁለት ረከዐዎች ላይ ከአል-ፋቲሐ ምዕራፍ በኋላ አንድ የቁርኣን ምዕራፍን ማንበብ ነቢያዊ ፈለግ በመሆኑ ላይ በዑለሞች መካከል የሃሳብ ልዩነት መኖሩን አናውቅም፡፡›› አል-ሙግኒ  ቅጽ ፡ 1 ገጽ ፡ 568፡፡