brightness_1 हदीसबाट प्रमाणित केही जिक्रहरू : (२)

हदीसबाट प्रमाणित केही जिक्रहरू : 

३) साअ्द बिन अबी वक्कास (रदियल्लाहु अन्हु) को हदीसमा छ, रसूल (सल्लल्लाहु अलैहि वसल्लम) ले भन्नुभयो : “के तिमीहरू हरेक दिन १०० नेकी कमाउन सक्दैनौ ? एकजनाले प्रश्न तेर्सायो- ए हजुर, एक दिनमा १०० नेकी कसरी कमाउने ? उहाँले जवाफमा भन्नुभयो : १०० चोटि ‘सुब्हानल्लाह’ भन्छौ भने अल्लाह तआलाले १०० नेकी दिनुहुन्छ वा १०० गल्तीहरू माफ गरिदिनुहुन्छ ।” (मुस्लिम : २६९८)

४) अबू-हुरैरह (रदियल्लाहु अन्हु) को हदीसमा छ, रसूल (सल्लल्लाहु अलैहि वसल्लम) ले भन्नुभएको छ : “जसले ‘सुब्हानल्लाहि व बिहम्देही’ दिनमा १०० चोटि पढ्छ, उसका सम्पूर्ण पापहरू पखालिनेछ, चाहे त्यो समुद्रको फिज बराबर नै किन नहोस् ।” (बुखारी : ६४०५)

रसूल (सल्लल्लाहु अलैहि वसल्लम) ले भन्नुभएको छ : “जसले ‘सुब्हानल्लाहि व बिहम्देही’ बिहान-बेलुका १००/१०० चोटि पढ्छ, कयामतको दिन ऊ भन्दा बढी नेकी अरू कसैको हुनेछैन । तर यदि कसैले ऊ जस्तै वा उसको भन्दा बढी पढेको छ भने उनीहरूको पुण्य उसको भन्दा बढी हुनसक्छन् ।” (मुस्लिम : २६९२)

हुनत जिक्र (अल्लाहको प्रशंसा गर्ने र महिमा गाउने) बारेमा धेरै हदीसहरू छन्, तीमध्ये केही सही हदीसहरू माथि प्रस्तुत गरिसकेका छौं । अबू-मूसा (रदियल्लाहु अन्हु) ले बयान गरेका छन्, रसूल (सल्लल्लाहु अलैहि वसल्लम) ले मलाई भन्नुभएको छ : “के तिमीलाई जन्नतका खजानामध्ये एउटा खजानाको बारेमा नभनुँ ? मैले भने- हजुर भन्नुहोस् न, उहाँले भन्नुभयो- ‘लाहौ ल वला कुव्व त इल्ला बिल्लाह’ पढ ।” (बुखारी : ४२०२), (मुस्लिम : २७०४)

अबू-हुरैरह (रदियल्लाहु अन्हु) को हदीसमा छ, रसूल (सल्लल्लाहु अलैहि वसल्लम) ले भन्नुभएको छ : “सुब्हानल्लाह, वल्-हम्दो लिल्लाह, वला इला ह इल्-लल्लाह, वल्लाहु अक्बर’ भन्नु मेरो लागि सूर्योदय हुनु भन्दा राम्रो हो ।” (मुस्लिम : २६९५)

brightness_1 हदीसबाट प्रमाणित केही जिक्रहरू : (३)

हदीसबाट प्रमाणित केही जिक्रहरू : 

त्यसैगरी ‘अस्तगफेरूल्लाह’ भन्नु पनि जिक्र हो । रसूल (सल्लल्लाहु अलैहि वसल्लम) ले भन्नुभएको छ : “म दिन-रातमा १०० चोटि ‘अस्तगफेरूल्लाह’ भन्ने गर्छु ।” (मुस्लिम : २७०२)

यो त उहाँको आफ्नो व्यक्तिगत अमल हो, तर उहाँले हामीहरूलाई पनि तौबा र क्षमयाचना गर्ने आदेश दिनुभएको छ । रसूल (सल्लल्लाहु अलैहि वसल्लम) ले भन्नुभएको छ : “हे मानिसहरू हो, “म दिन-रातमा १०० चोटि ‘तौबा’ गर्दछु, तसर्थ तिमीहरू पनि तौबा गर ।” (मुस्लिम : २७०२)

अबू-हुरैरह (रदियल्लाहु अन्हु) को हदीसमा छ, रसूल (सल्लल्लाहु अलैहि वसल्लम) ले भन्नुभएको छ : “अल्लाहको कसम, म दिन-रातमा १०० चोटि ‘अस्तगफेरूल्लाह’ भन्छु र तौबा गर्दछु ।” (बुखारी : ६३०७)

हामी, जिक्रलाई एउटा महत्वपूर्ण हदीस बयान गरेर समाप्त गर्न चाहन्छौं । अबू-हुरैरह (रदियल्लाहु अन्हु) को हदीसमा छ, रसूल (सल्लल्लाहु अलैहि वसल्लम) ले भन्नुभएको छ : “दुइटा यस्ता कुराहरू छन्, जुन जिब्रोमा एकदमै हलुका तर तराजुमा एकदमै भारी र अल्लाह तआलालाई एकदमै मन पर्छ; ‘सुब्हानल्लाही व बिहम्देही, सुब्हानल्लाहिल्-अजीम’ ।” (बुखारी : ६४०६), (मुस्लिम : २६९४)