brightness_1
ئەگەر ئەو كەسەی پژمی و نەیوت : (الحمد لله) ئەوا سوننەتە وەڵام نەدرێتەوە.
ئەگەر ئەو كەسەی پژمی و نەیوت : الحمد لله , ئەوا سوننەت نییە وەڵام بدرێتەوە , بەڵكو سوننەتە وەڵام نەدرێتەوە , بە بەڵگەی فەرموودەكەی (أنس) – رەزای خوای لەسەر بێت – فەرموویەتی : (دوو پیاو لای پێغەمبەری خوادا(صلَّى الله عليه وسلَّم) پژمین , پێغەمبەری خوا(صلَّى الله عليه وسلَّم) وەڵامی یەكێكیانی دایەوەو وەڵامی ئەویتریانی نەدایەوە , كابرا وتی : ئەی پێغەمبەری خوا(صلَّى الله عليه وسلَّم) وەڵامی ئەوت دایەوە و وەڵامی منت نەدایەوە , فەرمووی : ئەم پیاوە حەمدی خوای كرد (واتە : وتی الحمد لله) و تۆ حەمدی خوات نەكرد(واتە : تۆ نەتوت الحمد لله) (بوخاری) ریوایەتی كردووە بە ژمارە (6225) ئەمە لە كرداری پێغەمبەری خوا(صلَّى الله عليه وسلَّم) بووە , وە لە قسەكانیشیدا هاتووە لە فەرموودەیەكدا (موسلیم) ریوایەتی كردووە لە فەرموودەی (أبو موسى)وە – رەزای خوای لێ بێت – دەڵێت : گوێم لێ بوو پێغەمبەری خوا(صلَّى الله عليه وسلَّم) دەیفەرموو : (ئەگەر یەكێكتان حەمدی خوای كرد ئەوا وەڵامی بدەنەوە و ئەگەر حەمدی خوای نەكرد ئەوا وەڵامی مەدەنەوە) (موسلیم) ریوایەتی كردووە بە ژمارە (2992) .
بەڵام ئەگەر جێگا و مەقامەكە جێگا و مەقامی فێركردن بوو وەكو ئەوەی باوكێك منداڵەكەی فێر دەكات , یان مامۆستایەك قوتابیەكانی , یان لە نمونەی ئەوانە كە جێگای فێركردن بێت , ئەوا پێی دەڵێت : بڵێ : الحمد لله, بۆ ئەوەی لەسەر ئەم سوننەتە پەروەردەی بكات چونكە رەنگە نەزانێت سوننەتە .
هەروەها ئەگەر كەسەكە هەڵامەتی بوو ئەوا لە پاش سێ جار وەڵام نادرێـتەوە , ئەگەر سێ جار پژمی ئەوا وەڵام دەدرێتەوە و لە پاش ئەوە وه‌ڵام نادرێتەوە .
بەڵگەش لەسەر ئەوە : ئەو فەرموودەیە كە (أبو داود) لە (سنن)ەكەیدا لە (أبو هریرة) وە ریوایەتی كردووە بە (موقوف )ی و بە (مرفوع)ی , دەڵێت : (وەڵامی براكەت بدەرەوە سێ جار وە ئەگەر لەوە زیاتر بوو ئەوا هەڵامەتە) (أبو داود) ریوایەتی كردووە بە ژمارە (5034) وە الألباني –رەحمەتی خوای لێ بێت- فەرموویەتی : (حسن موقوف و مرفوع) (صحيح أبي داود 4/308) .
وە ئەم فەرموودەیە فەرموودەیەكی تر پشتگیری دەكات كە (موسلیم) ریوایەتی كردووە لە (سه‌حیح)ەكەیدا , لە فەرموودەی (سلمة بن الأكوع) كەوا گوێی لێبوو پێغەمبەری خوا(صلَّى الله عليه وسلَّم) لە كاتێكدا كابرایەك لایدا پژمی , پێی فەرموو : (يَرْحَمُكَ اللّهُ) كابرا جارێكی تر پژمی , پێغەمبەری خوا(صلَّى الله عليه وسلَّم) پێی فەرموو : ئەم كابرایە هەڵامەتی هەیە) (موسلیم) ریوایەتی كردووە بە ژمارە (2993) .
بە پێی ئەوانەی پێشوو كەسێك پژمی لە دوو حاڵەتدا وەڵام نادرێتەوە :
1/ ئەگەر نەیگوت (الحمدلله) .
2/ئەگەر لە سێ جار زیاتر بوو ,چونكە ئەوە هەڵامەتە.
