brightness_1 Shkruarja e testamentit është prej sunetit

Lënia e testamentit është sunet për çdo musliman, sido qoftë ai: i sëmurë a i shëndetshëm; bazuar në thënien e të Dërguarit të Allahut (Paqja e Allahut qoftë mbi të!): “Çdo muslimani, që dëshiron të lërë amanet diçka (me testament), nuk duhet t’i kalojnë dy netë pa e pasur pranë vetes të shkruar testamentin që do të lërë.” (Transmeton Muslimi  nr. 1626) Ky hadith është transmetuar nga Ibn Umeri (Allahu qoftë i kënaqur me të dy!). Përmendja e dy netëve në hadith nuk vjen në mënyrë kategorike (të prerë), por përmes saj ka dashur të theksojë, që muslimanit nuk duhet t’i kalojë as edhe një kohë e shkurtër, pa e pasur pranë vetes testamentin që do të lërë. Arsyeja është se ai nuk e di se kur do të vdesë. Ky është një ligj i përgjithshëm për tërë njerëzit (askush nuk e shmang dot vdekjen dhe se ajo vjen papritur).

Ndërsa testamenti i përket detyrimeve ndaj Allahut të Lartësuar, si: zekati ose haxhi, ose shlyerja (obligative) etj.; ose ai që ka të bëjë me të drejtat e njerëzve, si: borxhi dhe çuarja në vend e amaneteve etj.; të gjitha këto janë obligim dhe jo sunet. Gjykimi i lartpërmendur bazohet në faktin se ky testament ka të bëjë me të drejtat dhe detyrimet, sidomos në rastet kur për këto (të drejta e detyrime) nuk ka dijeni askush (një rregull juridik në sheriatin islam thotë se ajo, pa të cilën nuk mund të përmbushet vaxhibi (detyrimi), është detyrim (në vetvete).

brightness_1 Toleranca dhe butësia në shitblerje

Kjo realizohet kur shitësi dhe blerësi të stolisen me tolerancë dhe butësi gjatë shitblerjes. Asnjëri prej tyre nuk bën të sillet ashpër kur bën pazar dhe diskuton për këtë, por duhet të tregohen tolerant.

Argument për këtë është:

Hadithi i Xhabir ibn Abdullahut (Allahu qoftë i kënaqur me të dy!), i cili tregon se i Dërguari i Allahut (Paqja e Allahut qoftë mbi të!) ka thënë: “Allahu e mëshiroftë atë person që tregohet tolerant gjatë shitjes, blerjes dhe shlyerjes së  borxhit.” (Transmeton Bukhariu nr. 2076)

Kështu pra, është prej sunetit që kur të kërkojë shlyerjen e borxhit, ta kërkojë me butësi, bazuar në thënien e Profetit (Paqja e Allahut qoftë mbi të!) : “…dhe shlyerjes së borxhit”.

brightness_1 Misvaku

Misvaku është prej suneteve të pakufizuar në kohë, pra, mund të përdoret në çdo kohë. Enesi (Allahu qoftë i kënaqur me të!), transmeton se Profeti (Paqja e Allahut qoftë mbi të!) nxiste shumë për këtë sunet, saqë ka thënë: “Kërkoj prej jush ta përdorni sa më shumë misvakun.” (Transmeton Bukhariu nr. 888)

Po në lidhje me misvakun, Aishja (Allahu qoftë i kënaqur me të!) transmeton se Profeti (Paqja e Allahut qoftë mbi të!) ka thënë: “Misvaku e pastron gojën dhe e kënaq Zotin.” (Transmeton Ahmedi me nr. 7 dhe En-Nesai nr. 5; Albani, në “El-Irua” vëll. 1, fq. 105, ka thënë se hadithi është sahih / i vërtetë.)

Misvaku është një sunet i fortë, siç u theksua në rastet e përmendura me herët, sidomos në ato që përsëriten përgjatë ditës e natës, si: në faljen e namazit të natës, kur merret abdes, para çdo namazi, kur hyhet në shtëpi etj. Allahu e di më së miri.

brightness_1 Përtëritja e abdesit për çdo namaz

Për muslimanin është sunet ta përtërijë (përsërisë) abdesin për çdo namaz. Prandaj, nëse merr p.sh. abdes për namazin e akshamit dhe pastaj e fal atë, kur të vijë namazi i jacisë, është sunet të rimarrë abdes, edhe nëse e ka abdesin. Pra, marrja e abdesit për çdo namaz është prej sunetit. 

Argument për këtë është:  :

Hadithi që gjendet tek Bukhariu, ku transmetuesi i hadithit thotë: “Profeti (Paqja e Allahut qoftë mbi të!) merrte abdes në çdo namaz.” (Transmeton Bukhariu nr. 214)

Gjithashtu, prej sunetit pëlqehet që muslimani të jetë i pastër gjatë gjithë ditës. Ky gjykim bazohet në hadithin e Theubanit (Allahu qoftë i kënaqur me të!), që tregon se Profeti (Paqja e Allahut qoftë mbi të!) ka thënë: “Për abdesin nuk kujdeset vetëm se një besimtar.” (Transmeton Ahmedi  nr. 22434, Ibn Maxhe nr. 277 dhe Ed-Darimi  nr. 655; Albani, në “Sahihu el-xhami” vëll. 1, fq. 225, ka thënë se hadithi është sahih / i vërtetë.)